at the feet of Jesus

Ds Thema hetmi scho voremne haube Jahr zimlech beschäftigt. I ha eigentlech den scho wöue ä Blog drüber schribä, aber has när glich immer wider lahsi, bismi ds Thema hüt wider ihghout het.

Fausd mi erst Blog nid gläsä hesch: i bi Ändi letscht Jahr ine Erschöpfigsdepression gheit.

I bi immer viu ungerwägs gsi, jede Abe Programm, Jugendgruppe leite, Worship Band und so witer. Und när isch d`Erschöpfigschdepression cho..

Und Gott het i dere Ziit mega starch zu mir gredt oder mir ufzeigt, wi wichtig dases isch mi zersch vo ihm lah zfüue!

I ha i dere Ziit, woni so viu ha los gha, so viles us eigeter Chraft probiert zmache, und es ischmer garnid ufgfaue. I ha scho immer wider stiui Ziit gmacht, aber eifach den wes i mi Ziitplan het passt.

I bi mega viu gstresst gsi mit auem woni ha müesse und wöue mache, und hüfig heimi när grad d Sache wonimi dri investiert ha meh gstresst ausmer Fröid gmacht.

I bi när ufd Gschicht vor Maria und der Marta gstosse. d Maria isch bide Füess vo Jesus härä ghockt und het ihm zueglost, währeddem d Marta beschäftigt isch gsi mit diene. d Marta isch ner zu Jesus und het gseit: „isches dir egau das mir d Maria nid hiuft? Säg ihre doch si söu mir oh häufä diene!“ Und Jesus seit ihrä: „du bisch besorgt und beunruehigt um viles. Aber nume öppis isch wichtig und d Maria hetsech für das entschide, und ds cha ihrä niemer näh.“

Mir Christe si gloub hüfig wi d Marta. Oder ömu ig uf jede Fau.. Mir si so sehr mit üsne Ufgabe beschäftigt dasmer ke Ziit meh hei zu Jesus zcho. Villech sogar z beschäftigt mit diene - angerne Mönsche zdiene, ir Chile zdiene.. Mir si besorgt und beunruehigt und hei z Gfüeu mir chöi itz nid eifach härä hockä.. Oder wei zersch üsi Ufgabe erledigt ha bevormer üs Ziit für Jesus näh.

Aber d`Maria het oh nid zersch ar Marta ghufe und isch när zu Jesus Füess ghocket, nei si het dere Ziit mit Jesus Priorität gäh.

Äs isch mega wichtig dasmer id Chile, Gottes Chünigriich und Mönsche investiere, aber das aues chöi mir viu besser wemer üs zersch bi ihm löh lah füue. Und ds zeut oh für di Autag, für di Job, für dini Fründschafte, we du di Ziit mit Gott priorisiersch, wird dir aues viu liechter fauä!

I ha letscht Wuche z erste mau dörfe ä Predigt ha bi üs ir Chile. Ds isch ä mega Challenge gsi für mi und i ha mega viu Ziit dri investiert. I ha mega viu vo mirä stiuä Ziit, vo mirä Ziit bide Füess vo Jesus drmit verbracht di Predigt zschribä.

Äs si oh immer wider Ziitä gsi wo mi hei ufgüut, aber würklech di quality time mit Jesus, die Ziit wos nid isch drum gange Predigt zschribe, sondern eifach bi ihm zsi isch sicher z churz cho. I hami mega gfröit de di Wuche wider chli meh Ziit zha. Aber di Wuche isch plötzlech mega vou gsi und di stiui Ziit isch wider viu z churz cho..

Hüt morgä bini ufgstange miterä mega längä To-do Listä und am Nami/Abe hani no abgmacht gha. I ha mega z Gfüeu gha, dass Gott mir seit i söu mir glich zersch d Ziit usenäh zum mit ihm zsi. I bi aber so gstresst gsi wäg mirä längä To-do Listä und ha dänkt i mache itz glich zersch au di Sache, i cha de när no Ziit mit Gott verbringe. I hami bewusst drfür entschidä Jesus nid di Priorität zgäh. I hami bewusst drfür entschidä das wo Jesus aus z einzig wichtigä beschribt as Ändi vo mirä To-do Listä z hänkä.

Und i bi dr ganz morgä mega gstresst gsi. I ha ke Fridä und oh ke Fröid gha.

Und i ha gmerkt i schaffes nid, i mah nüm, i ha ke Energie meh. I ha mirä Kollegin müesse absägä und mit mirä To-Do Listä bini oh nid fertig wordä.

Aber i hamer när di Ziit gno zum zu Jesus zcho, wiu i ha einisch meh gmerkt wi wichtig dases isch mi zersch bi ihm lah zfüue.

& weisch was? i gloub mi ganz Tag hät angers usgseh weni uf Jesus glost hät und mir zerschi di Ziit mit ihm hät usegnoh. I hät äuä mini To-Do Listä glich nid fertig gschafft, aber i gloube i hät viumeh Fridä und Fröid gha bi däm woni ha gmacht.

Villech geits dir ja oh so, dass du dini Ziit mit Jesus immer bis ah Schluss schiebsch, „villech längts de no u villeh haut oh nid“, dass du dini Ufgabe priorisiersch.

Villech bisch gstresst, hesch z Gfüeu di angere Sache müesse itz haut gmacht si, villech bisch besorgt, beunruehigt?

Und de wettidi mega ermuetigä dere Ziit bide Füess vo Jesus Priorität zgäh. Wiu di Ziit bi sinä Füess isch dert wo mir uftanke, dert wo mir d Fröid überchöme für ds womer mache, dert wo mir gstercht wärdä.

We mir nid mit Fröid chöi diene, so wi d Marta wo isch zu Jesus cho undsech beschwärt het über d Maria, de heimer di Ziit bi sinä Füess vernachlässigt.

Wiu Fröid isch öppis wo dr Heilig Geist i üs bewürkt, und we mir ke Fröid hei bim diene de isches ar Ziit zu sine Füess z hockä. Üs bi ihm lah zfüue. Sinä Wort zuezlose. Üse Fokus nöii usrichtä.

Im Johannes 15:5 steit: „wer mit mir verbunde blibt, so wi ig mit ihm, dä treit viu Frucht. Wiu ohni mi chöit dir nüt tue.“

Ohni ihn chöi mir nüt tue. Aber we mir mit ihm verbunge blibe, immer wider zu sinä Füess chöme, de wärdemer viu Frucht trägä.

Äs lohntsech di Ziitä mit ihm z priorisierä!

Im Lied „Dy Fride“ vo Eden Music heissts ir Bridge: „Im Chaos würd i versinke, we nid du mi Fokus wärsch, unger dirä Obhuet chunnt mis Härz zur Rueh“

So hanimi hüt gfüeut, aus würdi im Chaos versinke, vo au däm woni söt, i ha niene nach möge, ha zGfüeu gha dasi niemerem grächt wirdä, wiui mi Fokus nid uf ihn grichtet ha.

Und unger sirä Obhuet, i dere Ziit woni zu ihm bi cho, isch mis Härz wider zur Rueh cho.

Wi schön dä Ort doch isch bi sinä Füess, ä Ort wo mir dörfe zur Rueh cho.

Äs git ke Ort woni lieber wär. Är isch aus für mi!

Fausdi ds Thema no witer interessiert chani dä Artiku hie sehr ämpfählä! https://www.scottlapierre.org/sitting-at-the-feet-of-jesus/