Erschöpfigs-depression

I ha lang nid gwüsst obi ds Thema hie überhoupt mau wirde ahspräche.. Aber i ha letscht Wuche grad äs Interview vor Janice Braun glost (si isch Jugendpastorin und depressiv), und si het gseit, dassi nid ersch wot drüber redä wesi us auem dus isch und när sägä i has gschafft, sondern wot si oh jetz drüber rede wo si ih däm inn isch.

Und hüt hani irgendwie grad zGfüeu gha dases dran isch afah zschribe. Villech chas dir ja oh häufä oder di ermuetige :)

Drum startemer doch hie mau.. Sit letscht September geits mir nid so guet.. I bi scho immer ä mega fröhlechi Person gsi, i has gliebt mit Lüt ungerwägs zsi, und es het viu brucht dasi mau mini Geduud verlore ha oder mi über öpper gnärvt ha.. Aber sit letscht Herbst hetsech öppis afah verändere.. I has mega schwirig gfunge im Autag fröhlech zsi, i ha nütme möge verliide, bi mega schnäu gnärvt gsi etc.. I hami säuber nüm erchennt.. Und es isch immer wi schlimmer worde, bisi im Dezember mi Töifpunkt erreicht ha..

Zu däm hani oh körperlechi Symptom gha wi Schwindu, Panickattacken, Chopfweh, woni gwüsst ha dases vom Stress här muess cho woni bsungers im letschtä haube Jahr ha gha.

I ha immer wi meh Sache afah absägä wiui ke Lüt ha möge gseh.. Weni mit Fründine ha abgmacht bini dr ganz Abe da ghocket und ghofft dasmer gli wider hei chöi.. Vor Wiehnachte bini chrank worde und i bi Tagelang grännend im Bett ghocket, i hami so hoffnigslos gfüeut, ahtribslos, ke Fröid, klar bini oh chrank gsi, aber i ha gwüsst öppis stimmt nüm.. Und i ha oh gwüsst das ds aues Ahzeiche fürne Depression si.. Aber i has irgendwie nid wöue wahr ha.. I ha über Wiehnachte 2 Wuche Ferie gha und i ha dänkt nach dene 2 Wuche geitsmer wider guet, i bruche eifach chli erholig..

Ds isch aber leider nid so gsi.. U när bini chrank gschribe worde.. Grund: depressivi Episode ufgrund vo Stress u Belastig. Ds isch für mi so usefordernd gsi! Ig, ig wo immer wo fröhlech bi gsi, wo ah Mitarbeitergspräch isch globt worde für ihri Fröhlechkeit und dr positiv Ihfluss ufs Team, ig hane Depression? Oder no schlimmer, ig wo Christ bi?! Christ und Depression?! ds passt doch nid zämä! Ig weiss das ir Bibu steit dasmer üs am Herr söue Fröiie, i weiss das mini Fröid i ihm zfinge isch, i weiss dasi i ihm Fröid ha wo nid vo mine Umstäng abhänging isch, und doch fautsmer im Moment so schwär irgendwie Fröid zfinge.

I ha i däm inn afah Gott sueche, bätä für heilig und i ha druf vertrout dasi gheilt wirde. I ha dänkt ds wird mis Zügnis, gheilt usder Depression, gheilt voder Erschöpfig. Und itz si 4 Mönet und i bi immerno i däm inn.. Es geitmer zwar scho dütlech besser und da bini uh mega dankbar, aber i füehlemi immerno mega ahtribslos, i muess immerno viu Sache absägä, grossi Mönschämänginä findi mega usefordernd und uf Gspräch chanimi nid lang konzentriere u schweife viu eifach ab.. Es geitmer immernonid guet.

Aber zrügg zu Gott :) Oh we ig nid heilig ha dörfe erläbä winimers gwünscht ha, erläbi Gott mega starch i dere Ziit! I darf im Moment so viu lehrä vo Gott und ds probieri oh chli uf mim Instagram mit öich zteile woni grad so dran bi mit Gott, wasmi bewegt und was är mi lehrt. I auem inne isch Gott doch so tröii. I weiss nid was si Plan isch mit au däm, i weiss nid genau werum ig dür au ds düre muess, aber i weiss das är guet isch, das er tröii isch und i bi dankbar für aus wo är tuet i mim Läbä.

Und no aus chliine Reminder: ja es cha si das du mir ds no nie ahgmerkt hesch, wiu ah dene Täg oder i dene Momente wosmer schlächt geit posti nid uf Instagram, oder we du uf Insta gsehsch dasi dus am spaziere bi de isch ds oft nachdem ig mi 2 Stung ha probiert z überwinde usem Huus zgah. Und oh weni unger Lüt bi merktme mirs hüfig nid ah wiui mir guet due ihteile was din ligt und was nid, und weni nid mah bini eifach nid unger Lüt.. :)

Drum: bis lieb und nachsichtig mit dine Mitmönsche, oh wesisech villech mau nid so verhaute wi du dir ds wünschisch, mir wüsse nie dür was si grad düre göh!

So ds wärs, mersii fürs läsä, wirde sicher i nächster Ziit ono meh drzue teile :)